Çikago, 20 maj 2012  - Vizioni i NATO-s për ballafaqim me sfidat e sigurisë më shekullin 21, do të konfirmohet në Samitin e 25-të që sot dhe nesër do të mbahet në Çikago. Zgjerimi i Aleancës nuk është në axhendë.

Në fokus së organizatës më të fuqishme ushtarako-politike do të jenë tri tema – Afganistani në periudhln e transicionit dhe më pas, kapacitetet e NATO-s për ballafaqim me sfidat e sigurisë lidhur me “mbrojtjen e mençur” të re dhe mburoja kundërraketore në Evropë, si dhe përforcimi i rrjetit të partneritetit të Aleancës nëpër botë.

Në Çikago, liderët do të kenë mundësi t’i shndërrojnë vendimet nga Samiti i Lisbonës në programe dhe nisma konkrete. Kjo do të thotë se NATO-ja duhet të vazhdojë me investimet politike, ushtarake dhe ekonomike që ta ruajë fuqinë e Aleancës, gjegjësisht duhet të mbetet e përkushtuar në parimet e veta, e gatshme t’i sigurojë kapacitett e nevojshme dhe t’i zhvillojë marrëdhëniet me partnerët. Sekretari i përgjithshëm i NATO-s Anders Fog Rasmusen shfaqi bindje se në Samit do të konfirmohet solidariteti i fuqishlëm i NATO-s, madje edhe në kohërat e vështira ekonomike, Aleanca e cila është e përkushtuar, e aftë dhe e ndërlidhur.

Republika e Maqedonisë në Samitin do të prezantohet nga presidenti Gjorgje Ivanov dhe ministrat e Mbrojtjes dhe të Punëve të Jashtme Fatmir Besimi dhe Nikolla Poposki. Delegacioni i Maqedonisë në të cilin janë edhe ambasadori i misionit pranë NATO-s Martin Trenevski dhe ambasadori në Shtetet e Bashkuara të Amerikës Zoran Jolevski.

Në suaza të Samitit, delegacioni i Maqedonisë, do të marrë pjesë në mbledhjen e paraparë për anëtaret e NATO-s dhe vendet – pjesëmarrëse në mision ISAF në Afganistan, që do të mbahet më 21 maj. Presidenti Ivanov do të mbajë fjalim në këtë mbledhje. Ditën e njëjtë është paraparë edhe takim i ndarë në nivel ministror të Maqedonisë, Malit të Zi, Bosnjë e Hercegovinës dhe Gjeorgjisë me vendet anëtare të NATO-s.

Është paraparë anëtarët e delegacionit të Maqedonisë të kenë një numër të madh takimesh me shtetet – anëtare të NATO-s.

Në aktivitetin intensiv diplomatik para Samitit, Republika e Maqedonisë kërkoi nga NATO-ja dhe SHBA-ja si vend lider mbështetje për anëtarësim të plotëfuqishëm në Aleancë dhe revizion të konkludimit nga Samiti i Bukureshtit në bazë të vendimit të Gjykatës Ndërkombëtare të Drejtësisë në Hagë.

Kryeministri Nikolla Gruevski u dërgoi letër liderëve të shteve – anëtare të NATO-s, në të cilën kërkoi që në axhendën e Samitit në Çikago të vendoset kërkesa për pranimin e Republikës së Maqedonisë, duke marrë parasysh se vendi i përmbushi kriteret për anëtarësim, ndërsa me pjesëmarrjen në misionin e Aleancës ISAF në Afganistan tregoi se mundet t’i marrë obligimet nga anëtarësimi.

Vullneti politik për pranim në Aleancë është konfirmuar edhe me Deklaratën e paradokohshme për riafirmimin e realizimit të qëllimit strategjik për anëtarësimin e Republikë së Maqedonisë në NATO  tëmiratuar në Kuvend.

Përndryshe, për momentin 182 pjesëtarë të ARM-së marrin pjesë në disa operacione paqesore jashtë kufijve të Republikës së Maqedonisë. Nga viti 2002 deri në vitin 2012 gjithsej në misione jashtë Republikës së Maqedonisë kanë marrë pjesë paqëruajtës nga Maqedonia në Irak 493, në Afganistan 2.021, BeH 202 dhe pesë në Liban.

Maqedonia e filloi pjesëmarrjen në NATO operacionin e udhëhequr ISAF në gusht të vitit 2002. me dërgimin e dy oficerëve si pjesë e kontingjentit turk. Më 8 shtator, Dita e pavarësisë së Republikës së Maqedonisë, flamuri i Maqedonisë për herë të parë valoi në Kabul. Në vitin 2003, ARM-ja e rriti kontributin e saj në ISAF me dërgimin e një njësie nga përbërja e brigadës së dytë këmbësorike si pjesë e kontigjentit gjerman.

Në rotacionin e dytë të çetës për sigurimin e Komandës së ISAF-it, Republika e Maqedonisë e rriti prezencën nga 90 në 127 pjesëmarrës, ndërsa nga janari i vitit 2008 dërgoi edhe tre oficerë shtabor në Komandon e ISAF-it në Kabul.

Për momentin Republika e Maqedonisë merr pjesë me një çetë të mekanizuar këmbësorike. Numri i përgjithshëm i pjesëmarrlsve për momentin është 142. Deri tani Republika e Maqedonisë ka marrë pjesë gjithsej me 790 pjesëmarrës në ISAF.

Përndryshe, rreth 10.00 njerëz, në mesin e të cilëve edhe 2.000 gazetarë, kanë ardhur në Çikago për shkak të ngjarjes. Shërbimi sekret vlerëson se në qytet do të arrijnë edhe mes 10.00 dhe 100.000 demonstrantë. Për sigurimin e pjesëmarrësve të Samitit në qytet do të angazhohen 3.100 pjesëtarë të policisë në Çikago. Qendra komanduese multikomunikuese e cila do t’i monitorojë të gjitha ngjarjet në dhe rreth Samitit është vendosur në lokacion sekret jashtë Çikagos, për çfarë janë angazhuar mbi 40 agjenci, duke përfshirë edhe FBI dhe Shërbimin Sekret.

Vjenë, 18 maj 2012  – Në Vjenë sot përfundoi Konferenca dytë vjetore të Qendrës për Dialog dhe Bashkëpunim Global (The Center for GlobalS Dialogue and Cooperation-CGDC) ku mori pjesë edhe zëvendës kryetari i Qeverisë së Republikës së Maqedonisë, Musa Xhaferi.

Në vigjilje të kësaj konference, siç kumtoi Sektori për marrëdhënie me opinionin pranë Qeverisë së Maqedonisë, Xhaferi realizoi një takim përshëndetës me ish presidentin e Shteteve të Bashkuara të Amerikës, Bill Klinton, i cili ishte prezent dhe kishte fjalim para pjesëmarësve.Gjithashtu, zëvendëskryeministri Xhaferi në kuadër të Konferencës ka realizuar disa takime dypalëshe, mes tjerash edhe me ish-gjeneralin e NATO-s, Uesli Klark, ku u bisedua për situatën në rajon dhe në Maqedoni dhe integrimi i vendit në Aleancën veri-atlantike.

Zëvendëskryeministri Xhaferi e njohu ish-gjeneralin Klark me reformat që bënë Maqedonia në rrugën e saj drejt anëtarësimit në NATO, duke përmendur edhe pjesëmarrjen në misionet paqësore të aleancës.Konstatim i përbashkët ishte se nevojitet edhe tejkalimi i pengesës së fundit, zgjidhja e çështjesë së emrit dhe Maqedonia të bëhet anëtare e plotë e NATO-s.

Zëvendëskryeministri Xhaferi e ftoi Klarkun si mik i shqiptarëve që të vizitojë Maqedoninë. Vizita pritet të realizohet muajve të ardhshëm ku ish-gjenerali do të jetë mysafir i zëvendëskryeministrit ndërsa pritet që të ketë ligjeratë në një nga universitet në vendin tonë.Ndryshe, në ditën e dytë të Konferencës së dytë vjetore të Qendrës për Dialog dhe Bashkëpunim Global (The Center for GlobalS Dialogue and Cooperation-CGDC) pjesëmarësit debatuan në temë “Demokracia dhe Fuqia ekonomike”. rap.Mia

ka shkruar një letër të hapur kreut të BDI-së, Ali Ahmetit pas deklarimit të tij të fundit lidhur me ngjarjet në Maqedoni, vrasjen e pesëfishtë, arrestimet dhe premtimin e tij për garanci për proces të drejtë gjyqësor.

Më poshtë vijon letra e plotë e BDSH-së:

Ju, Zoti Ahmeti, ish Komandat i Përgjithshëm i ish Ushtrisë Çlirimtare Kombëtare, në të gjitha fushatat njëpasnjëshme elektorale për pushtetin maqedonas, në cilësinë e Kryetarit të BDI-së “garantove se asnjë person i pafajshëm nuk do të pësojë nga proceset gjyqësore”… Madje fjala “GARANCI” dhe motoja “NE E MBAMË FJALËN!” përbënin shtyllat e propagandës të partisë që udhëhiqni Ju!

Përkundër “garancive” që dhatë gjatë fushatave elektorale dhe ligjit për amnisti, mbi 2000 ish ushtarë të ish UÇK-së janë torturuar në hetuesinë e shtetit maqedonas, për të pranuar veprat penale të cilat nuk i kanë kryer! E Ju ishit në koalicionet e njëpasnjëshme qeveritare në Maqedoni!

Përkundër “garancive” që dhatë, qindra ish ushtarë të ish UÇK –së janë dënuar me dënime të rënda ndërsa dhjetëra të tjerë me burgim të përjetshëm! Të gjithë të akuzuar “për vepra kriminale” të cilat nuk i kanë kryer por janë detyruar përmes  torturave çnjerëzore të pranojnë fajësinë apo të ngarkojnë të tjerët për fajet që nuk i kanë bërë! E Ju ishit në koalicionet e njëpasnjëshme qeveritare në Maqedoni!

Ju, Zoti Ahmeti,  keni qenë në dijeni të plotë për të gjitha rastet! Dhe sa ishe në pushtet Ju heshtnit Zoti Ahmeti!

Përkundër fakteve dhe dëshmive të shumta për pafajësinë e të dënuarve për «Rastin Sopoti 1»

në vend të lirimit të tyre dhe mbajtjes së fjalës elektorale, gjatë bashkëqeverisjes suaj me VMRO-në u konstruktua edhe «Sopoti 2»!

Ju heshtët edhe kur Ramadan Bajrami deklaroi publikisht se dëshmitë e tij ishin konstruktuar nën tortura dhe presion të tmerrshëm!

Ju heshtët edhe kur ish ambasadori amerikan, z. Bigman deklaroi se hetimet e NATO-s kishin sjellë konkluzione se të dyshuarit ishin të pafajshëm!

Ju heshtët edhe kur ish Ministri i Mbrojtjes së Maqedonisë, V. Buçkovski, deklaroi se shqiptarët jo vetëm në Maqedoni por në tërë rajonin e konsiderojnë NATO-n, dhe në veçanti SHBA-të si aleat të tyre dhe se prapa vendosjes së minës në fshatin Sopot mund të qëndrojnë shërbimet sekrete serbe!

Ju heshtët edhe pse e dinit se shqiptarë të pafajshëm, të torturuar barbarisht, vuajnë padrejtësisht dënimet me burg.

Ju, Zoti Ahmeti, kur jeni në pushtet heshtni! Vetëm në fushata elektorale, kur duhet të kërkohet vota e popullit Ju jeni shumë të zëshëm!

Ju ishit shumë të zëshëm edhe për Masakrën e Brodecit! Sepse nuk ishit në pushtet! Ju e dënuat dhunën e ushtruar ndaj fshatarëve të pafajshëm të fshatit Brodec dhe fushatën elektorale e artikuluat me premtimet se do t’i lironi të gjithë të burgosurit e pafajshëm shqiptarë!

Sapo erdhët në pushtet ndërruat diskursin! Ju publikisht garantuat nga pozita e Qeverisë së Maqedonisë se do të sigurohen procese të drejta gjyqësore të drejta dhe se asnjë person i pafajshëm nuk do të pësojë nga ky proces!

Asnjë shqiptar i arrestuar në fshatin Brodec nuk u lirua dhe qytetarët e arrestuar u dënuan me 190 vjet burg të rëndë! Ju heshtët dhe nuk e ngritët zërin!

Nga pozita e Qeverisë së Maqedonisë Ju garantuat se do të sigurohen procese të drejta gjyqësore të drejta dhe se asnjë person i pafajshëm nuk do të pësojë edhe në rastin e montuar gjyqësor kundër tre ish ushtarëve të ish UÇK-së, Ismail Aqemi, Bashkim Bajrami dhe njërit nga udhëheqësit e luftës, z. Harun Aliu (Komandant Kushtrimi)!

Ju heshtët kur u dënuan me burg të përjetshëm ! Ju heshtët sepse ishit pjesë e pushtetit!

Ju heshtët edhe kur Qeveria e Maqedonisë ekzekutoi në formën mafioze veprimtarët e shquar  të çështjes kombëtare Harun Aliu, Shaban Zenuni, Qemajl Fejzullahu dhe Xhafer Shala!

Ju heshtët sepse ishit pjesë e Qeverisë së Maqedonisë!

Ju, Zoti Ahmeti, heshtët edhe kur zëdhënësi i MPB-së Ivo Kotevski arsyetoi policin maqedonas, Jakim Triunfovskin, se gjoja kishte vrarë nga pozitat e vetëmbrojtjes dy të rinj shqiptar Besnik Shehapin (26) dhe Imran Mehmedin (30) në Gostivar !

Ju heshtët edhe kur Ministria e Brendshme e qeverisë suaj, Gordana Jankullovska, deklaroi se « Deklarata e Kotevskit është nxjerrë nga konteksti dhe është interpretuar gabimisht !

Ju heshtët plot dy javëve edhe pse opinion publik shqiptar dhe më gjerë u revoltua nga aksioni i Monstrumëve të Qeverisë suaj që  terrorizoi popullsinë shqiptare dhe arrestimi i njerëzve të pafajshëm!

Revolta që shkaktoi deklarata e Ministres së Brendshme të qeverisë suaj, Gordana Jankullovska, e cila në cilësinë e hetueses, e polices që arreston, e prokurores që ngre aktakuzë dhe e gjyqtares që dënon lidhur me “ radikalistët islamik” që kanë luftuar edhe kundër NATO-s ju detyroi të prononcoheni pas dy javësh! Dhe si???

Në intervistën ekskluzive për televizionin shtetëror  MTV 2, Ju, Zoti Ahmeti, deklaruat se “ishit informuar nga partnerët e koalicionit se deklarata e Jankullovskës ishte nxjerrë nga konteksti…! dhe garantuat se asnjë i pafajshëm nuk do të pësojë në këtë proces gjyqësor ”

Deklarata Juaj për shfajësimin e Jankullovskës është neveritëse! Por ajo që është e rrezikshme në deklaratën tuaj lidhet me përgatitjen e terrenit që shqiptarët të cilët do të dënohen në këtë proces të montuar gjyqësor të pranohen nga opinioni publik si «fajtor»!

Zoti Ahmeti! Ju e dini fare mirë se përkundër faktit që Maqedonia ka nënshkruar dhe ratifikuar  me 12 dhjetor 1994 «Konventën kundër torturës, veprimeve dhe dënimeve mizore, trajtimeve çnjerëzore dhe poshtëruese» realiteti dëshmon të kundërtën: shqiptarët rrihen, poshtërohen, çnjerëzohen, maltretohen, torturohen, dënohen, vriten dhe masakrohen me bekimin e autoriteteve politike të Shkupit!

Zoti Ahmeti! Ju e dini fare mirë se edhe në këto momente kur lexoni këtë letër të hapur hetuesia e Qeverisë së Maqedonisë torturon shqiptarët për t’i detyruar të pranojnë veprat që nuk i kanë bërë!

Opinionit publik shqiptar i kujtohet fare mirë kur në Emisionin «Rruga Drejtë» të TV Alsat-M deklaruat se “ Ja kemi dhënë fjalën Nikolla Gruevskit se nuk do t’i hapim këto çështje dhe ne nuk mund të bëhemi të pafytyrë me te!”

Po, Zoti Ahmeti! Këtu e keni dëshmuar veten! Je e mbani fjalën dhe nuk jeni të pafytyrë me ata që shtypin shqiptarët! Po me çfarë fytyre do të dilni të kërkoni edhe një herë mandatit e popullit shqiptar!

Zoti Ahmeti! Është momenti i fundit që të lëshoni Qeverinë antishqiptare të Maqedonisë dhe të bashkohemi të gjithë përreth një platforme të mirëfilltë për realizimin e të drejtave legjitime të shqiptarëve në Maqedoni! Të bashkohemi siç kërkuan ish-kongresmeni amerikan Joseph DioGuardi Liga Qytetare Shqiptaro-Amerikane,  Komuniteti Shqiptaro-Amerikan dhe të gjitha shoqatat shqiptare në shtetet e demokracive perëndimore!

Vetëm një bashkim i përgjithshëm rreth një platforme unike do të hapte perspektivën për përfundimin e dhunës dhe heqjen e diskriminimit racial që regjimi terrorist i Maqedonisë ushtron ndaj shqiptarëve! (INA)

Dy persona janë plagosur mbrëmë në Shkup me armë zjarri, duke i shpëtuar një tentimi për vrasje.  Siç bëhet e ditur nga mediat maqedonase të plagosurit janë Daniel A, 24 vjeç dhe Bojan J. nga Shkupi, të cilët janë sulmuar me armë zjarri nga Miroslav M. i njohur me dosje kriminale.  Sipas policisë, dy të plagosurit me plagët e rënda kanë mbërritur në stacionin policor Gjorçe Petrov, ku edhe kanë informuar për ngjarjen.

Ata menjëherë janë dërguar në Qendrën Klinike të Shkupit ku janë konstatuar plagë nga arma e zjarrit në krahëror dhe këmbë. Organet e rendit mbrëmë nuk kanë kumtuar motivet e këtij tentimi për vrasje. raporton Ina

në Maqedoni kanë paralajmëruar protestë para Qeverisë me kërkesat për zhdëmtimin e ish të burgosurëve dhe të dëmtuarëve politik shqiptarë gjatë regjimit të kaluar.

Propozimi për protestën ka pasuar sot pas një debati të organizuar lidhur me Projekt- Ligjin për zhdëmtimin e ish të burgosurëve dhe të dëmtuarëve shqiptarë, me ç`rast më 7 qershor është caktuar mbajtja e protestës para Qeverisë së Maqedonisë.

“Kjo protestë paqësore me vlera evropiane, ku në mënyrë intelektuale dhe paqedashëse të ngritet zëri për këtë padrejtësi shekullore. Njëkohësisht, prej periudhës 1 deri më 7 qershor, ftohen të gjithë qytetarët dhe familjarët e persekutuar, që të paraqesin aktpadi penale kundër shtetit pranë gjyqeve ku janë dënuar”, theksuan pjesëmarrësit e debatit.

Kryetari i SHHSHM-së, Skender Asani, shprehu përkrahjen ndaj kërkesave legjitime të SHBDPSHM-së, të cilat duhet sa më parë që të hyjnë në procedurë parlamentare dhe të zhdëmtohen në mënyrë adekuate të gjithë të dëmtuarit shqiptarë nga ish regjimi komunist. Sipas Asanit, vetëm me sjelljen e një ligji korrekt, do të mund që në njëfarë forme të korrigjohen gabimet historike të së kaluarës.

Halide Palloshi, ish-e diferencuar politike, tha se politika shqiptare në Maqedoni, urgjentisht duhet të angazhohet për sjelljen e një ligji të tillë për zhdëmtim, deri një gjë të tillë e kanë bërë shumë shtete të botës demokratike.

Kryetari i SHBDPSHM-së, Shpëtim Pollozhani, theksoi se që nga viti 2005 kanë nisur fushatën për sjelljen e një ligji të tillë, por tani është koha e fundit që propozim-ligji aktual i partisë shqiptare në pushtet BDI, të harmonizohet edhe me kërkesat e shoqatës dhe të miratohet sa më shpejtë në parlament. Pollozhani tha se në propozimin e shoqatës kërkohet që të përfshihet periudha 1944-1991, ku llogaritet se janë persekutuar në forma të ndryshme afër 24.000 shqiptarë të Maqedonisë, e që nëse shihet me hollësi del se gati asnjë familje shqiptare nuk ka shpëtuar pa pasur të persekutuar.

Arben Sulejmani në emër të SHHSHM-së, tha se duhet një konsensus  i përgjithshëm që ky ligj të miratohet sa më shpejtë dhe të përfshihen të gjitha kategoritë e të dëmtuarve.

Kryetari i LASH-it, Nuhi Dardhishta, tha se një kategori e gjerë e të dënuarve dhe të persekutuarve janë  edhe në mesin e arsimtarëve shqiptarë që nga vitet e 90-ta.

Etem Xheladini, kryetar i SHASH-it për Kumanovë-Likovë, tha se vetëm në rajonin e Kumanovës e Likovës  ka pasur rreth 1200 të persekutuar dhe mbi 300 të burgosur.

Historiani Qerim Lita, zëvendësdrejtor i Arkivit Shtetëror të Maqedonisë, përmes dokumenteve të shumta prezantoi ekzekutimet, burgosjet dhe torturimet e shqiptarëve që nga nëntori i vitit 1944, e deri në vitet e demokracisë. Periudha 45 vjeçare komuniste ishte periudha më e errët për shqiptarët, ndërsa tani është koha e fundit që të jetë prioritet mbi prioritetet realizimi i këtyre të drejtave.

Edhe ekspertët juridik Nazmi Maliqi dhe Osman Kadriu, theksuan se ka disa modalitete ligjore që kjo padrejtësi e kahershme tani të korrigjohet, meqë shumica e kësaj kategorie të maqedonasve e kanë zgjidhur këtë çështje, por ka mbetur problemi i shqiptarëve. Kadriu tha se shumica e këtyre gjykimeve ishin të natyrave politike, andaj për zgjidhjen e problemit duhet edhe një diskonim politik.raporton Ina

Sot në Prizren u përurua Abetarja e përbashkët Shqipëri-Kosovë. Në ceremoninë e organizuar ishin të pranishëm presidentja e Kosovës, Atifete Jahjaga dhe krerët e qeverive të dy vendeve, Hashim Thaçi e Sali Berisha…. Kryeministri Thaçi tha se kjo është një ditë historike për kombin shqiptar, ndërsa Berisha e cilësoi abetaren si kryevepër të dijes që i dhurohet kombit shqiptar.

Duke e vlerësuar si një moment historik, Abetaren gjithëkombëtare kryeministri Berisha e quajti margaritar të Njëqindvjetorit të Pavarësisë së Shqipërisë dhe një moment domethënës për gjithë kombin, në rrethana kur Kosova është e pavarur.

Më 24 prill ishte përzgjedhur teksti fitues për Abetaren e përbashkët Shqipëri-Kosovë. Teksti ka katër autorë, dy nga Shqipëria, Shezai Rrokaj, Mimoza Gjokutaj si dhe dy nga Kosova, Islam Krasniqi dhe Saranda Kumonova Pozhegu. Ndërsa grafika është realizuar nga Lorenc Buzi. Përzgjedhja është bërë nga komisioni vlerësues me përfaqësues të dy vendeve. Në garë ishin 13 Shtëpi Botuese, nga të cilat fituese është shpallur Shtëpia Botuese “Pegi” dhe shoqëria “Dukagjini”.

Eurodeputeti italian, Mario Borghezio gjatë një interviste në radion Radio24 ka fyer shqiptarët duke ngjallur njëkohësisht reagime të shumta. Në programin “La Zanzara”i Giuseppe Cruciani, të datës 12 maj, ai shpreht se Shqipëria është një vend i mrekullueshëm, nëse i heq banorët.
Eurodeputeti i cili jo pak herë ka shprehur mendimet e tij raciste na konsideron si vend i botës së tretë ku gratë punojnë shumë ndërsa burrat rrinë kot, “Non fanno un cazzo” sipas tij.
Duke marrë shkas nga diplomimi i Renzo Bossi-t në Shqipëri dhe i nxitur nga drejtuesi i emisionit, Giuseppe Cruciani, që e nis bisedën me Borghezion duke i kujtuar ironinë e publikut me batutën e famshme të Legës të kthyer në “Lega tiene … Durazzo” pas diplomës shqiptare të Troftës, Borghezio shpërthen duke u shprehur: “Nuk është e vërtetë, lajmi u përgënjeshtrua. Asnjë prej nesh nuk frekuenton Shqipërinë, që po t’i heqësh banorët është një vend i mrekullueshëm. Mbi shqiptarët secili ka mendimin e vet, unë kam një mendim timin….Ato pak herë që kam qenë në Shqipëri sipërmarrësit italianë atje më kanë thënë se ishin shumë të kënaqur nga gratë shqiptare që punojnë shumë, ndërsa burrat nuk bëjnë asgjë, rrinë gjithë ditën në kafene duke pirë nargjile, janë kushërinj të afërt të arabëve… Po të shkosh në Tiranë do shohësh që gratë punojnë rëndshëm ndërsa burrat “Non fanno un cazzo”.
Nga studio një i ftuar tjetër thotë “Bossi edhe mund të përgënjeshtrojë por fakti është që ajo diplomë ekziston, që dekani i universitetit thotë se ia kanë lëshuar Renzos?”
Por Borghezio merr flakë: “E kush e thotë dekani i një universiteti në Tiranë? Shqipëria ka qenë edhe koloni e Serenissimas, por sot është ajo që është, ka administratën që ka. Nuk them ta fshijmë nga faqja e dheut, është një vend i botës së tretë që duhet ndihmuar…Shqipëria nuk bën pjesë në komunitetin europian, ndonjëri dëshiron t’i fusë, por ne jo! Fatmirësisht shqiptarët nuk vijnë më në Itali, kanë kuptuar që janë më mirë atje ku janë, se te ne me qeverinë Monti. E sidoqoftë “nuk thashë asnjëherë që shqiptarët janë k*** kandari”.

Fjalimi i Deputetit te PDSH-se z.Zeadin Sela 15.5.2012:
“zoti Tahir Hani, kur ishit deputet thuajshe se qytetaret nuk duan te perdorin gjuhen shqipe sepse jane mesuar me shabllone. Pse ju me kete propozim-ligj nuk keni parapare qe te perdoret gjuha shqipe ne keto propozimet e reja te Ministrise se Transportit…”

“zoti Hani ju ne 100 diteshin e pare te qeverise e paraqitet si te arritur ndertimin e hekurudhes Kërçove-Struge, askund nuk eshte ajo linje. Akoma me shume me len pershtypje kur thoni linja Kërçove-Lin (Shqiperi). Ku e shiqoni kete linje hekurudhore Kërçove-Lin (Shqiperi)??? Une perditë kaloj ne ate rruge dhe askund nuk shoh qe keni ndertuar dicka. Me duket qe ju halucinon per kete, dhe ne mjekesi halucinacioni diagnostifikohet si karakteristike e shizofrenise”.

Malltretohen dhe rrihen ne burgun e Manastirit te arrestuarit ne aksionin “MONSTRUM”

3 nga 6 të arrestuarit në aksionin policor ‘Monstrum’ të cilët gjenden në paraburgim janë torturuar dhe rrahur në burgun e Manastirit, mëson sot Alsat M. Lajmi është denoncuar nga familjarët e të paraburgosurve të cilët i kanë vizituar në burg dhe kanë vërejtur se të afërmit e tyre kanë në trup dhe fytyrë, shenja të dukshme që tregojnë se janë keqtrajtuar dhe rrahur.

Familjarët e kanë paraqitur rastin edhe tek Avokati i Popullit për të kërkuar hetime dhe masa përkatëse për të parandaluar përsëritjen e keqtrajtimit dhe torturimit të të afërmve të tyre që gjenden në paraburgim, si dhe me qëllim, ndëshkimin e autorëve të këtij akti

Ka natë që nuk shtie gjumë në sy. Dikur e kishte shtëpinë plot, djem, nipa e mbesa. Tani më nuk e ka askë pranë vetes. Jeton vetëm, në një shtëpi të vjetër, në Abri të Poshtme të Skënderajt, me 40 euro pension pleqërie. Xhemile Zeka, një grua që ka mbushur 72 vjet, i kujton me shumë mall tre djemtë e vet, të cilët dikur ishin krenaria e saj, ndërkohë që asnjëherë nuk i kishte shkuar ndërmend se do ta ketë fatin aq të keq, sa që në vitet e shtyera do të mbetet fillikat vetëm.

“Ka natë që nuk shtie gjumë në sy. Flas me djemtë e mi, vetmevete. I qes përpara fotografitë e tyne dhe flas me ta. Edhe flas edhe qaj, derisa të lodhna. Ky është fati im”, thotë ajo, derisa nuk i ndanë sytë nga fotografia e djalit të saj, Bajramit, ish-luftëtar i UÇK-së, tani dëshmor.

Vdekja e djalit, Halilit, në Kroaci

“I pata tre djem, Halilin, Bajramin dhe Bahtirin. Burri më pat vdekur herët, kështu që unë i rrita ata. Halili shkoi në Kroaci, u martua atje me një kroate. Shkoi atje për me punu, për me e nimu shpinë, sepse nuk kishim, ishim fukara. Halili ka vdekur atje, edhe eshtrat e tij pushojnë atje diku. E ka lënë një djalë.

Edhe gruaja e tij kroate ka vdekur. Vetëm djali i Halilit, nipi jem, është diku atje. Ai nuk di me folë shqip, edhe nuk vjen kurrë. Ndoshta edhe kish me ardhë, po unë nuk po di as qysh me e gjetë. Më kanë me më nimu dikush, po nuk ka as kush më nimon. Xhemilja thotë se kishte hjekë shumë për t’i rritur fëmijët e saj.

“I kam rritë këta djem me copa buke, besa edhe çikat i kam rritë qashtu. E Halili, kur shkoi në Kroaci me punu, na e dha krahun, besa goxha mirë i bamë punët. Edhe unë isha e fortë, por nuk po dalke kurrë qysh menon njeri. Shumë kisha pas qef me kanë me e varros Halilin në Abri, në varre tona.

Bile kisha pas ku me shku, edhe me kajt nashta ngat varrit të tij. Kështu qysh është qitash, sikurse mos me e pas këtë djalë hiq. I hupun ma. Nuk di as ku me e gjetë varrin e tij, se isha shku, i kisha ra qysh kisha mujt, e pa shku s’e kisha lanë kurrë. Besa tash jam plakë, ma nuk po muj as me dalë te dera”, qan hallin e vet plaka.

Rënia dëshmor e djalit, Bajramit

Por, Xhemilja nuk mund të përmbahet, kur zë në gojë djalin tjetër të saj, Bajramin, luftëtar i UÇK-së, tani dëshmor. Qan edhe më zë, kur i kujton pamjet rrëqethëse të djalit të saj, të mbuluar me gjak. Nga oborri i shtëpisë së saj e shikon vendin e rëniës heroike të Bajramit.

“Qe, te ai gardhi atje u vra Bajrami. Kur më thane se u vra, gati vdiqa edhe unë. U rrotullua krejt rreth meje. Gjithçka u bë zi. Bërtita sa munda, nuk doja të besoja se u vra djali im. Një djal trim, i cili nuk priti as edhe një minutë për ta kapur pushken. Vetëm ai më pat mbetë në shpi, punonte shumë, edhe idaren na e siguronte. Shkova dhe e gjeta të shtrirë për dhe, pa shpirt”, kujton ajo ditën kur ra dëshmor djali Bajrami.

Djali i tretë i Xhemiles, Bahtiri, ishte tretur diku në Amerikë, edhe ai në kërkim të një idareje për familjen e vet. Lidhjet me shtëpinë i ishin këputur deri pas lufte.

“Bahtiri shkoi në Amerikë, nuk e di as qysh ka shku atje. Por me të lidhja na hupi, por pasi ishte Bajrami, ai kujdesej për neve, për mua dhe për fëmijët e vet. Halili punonte në Kroaci, edhe ai me gruan e vet kroate e me djalin e vet. Isha e lumtur veç kur e dijsha se janë shnosh.

Shpinë ma mbushi me fëmijë Bajrami. Tre fëmijë sikurse drita. Edhe idare kishim, por ra lufta e më la pa askend. Unë kam nipa e mbesa, po nuk janë me mu, kanë shkuar te tanë, më lanë vetëm në këtë shtëpi, e cila veç sa nuk është rrëzu. Nganjëherë vjen një motër edhe rri me mue. Por kërkush nuk më ka faj bre loke, kështu është shkru”, sikur pajtohet me fatin e saj të keq, Xhemilja.

Vdekja tragjike e nipit, Argjentit, në Amerikë

Gjendjen edhe ashtu të rëndë shpirtërore të Xhemiles, e kishte rënduar lajmi që i kishte ardhur nga Amerika, për vdekjen tragjike të nipit të saj, Argjentit.

“Majsha ymyd që djali i Bahtirit, Argjenti, të kthehej nga Amerika, e të vijë e të jetojë me mu. Unë nuk kisha nie kurrë kurrgja për Bahtirin prej se ishte shku në Amerikë, edhe pse kam vetë gjithkah për ta.

Nuk kam lanë vend pa vetë, por kërkush nuk dijke me më kallxu kurgja. Një ditë, para dy vjetëve, erdhen do njerëz edhe me thanë se një nip i yti ka ba ndeshje edhe se ka vdekë në vend. Po ku, i veta, se unë menojsha për këtë djalin e Halilit që është në Kroaci. Jo more, më thanë, në Amerikë, Argjent e ka emnin. Mbeta e shtangun në vend. As nuk dijsha çka me iu thanë.

Gjithçka m’u zi në kry, thashë me vete mos po më rrejnë këta. Ju thashë ecni se nuk është e vërtetë, por ata bënin be, se po e thoshin të vërtetën”, kujton ajo, “ditën më të zezë”, si thotë, në jetën e saj. “Boll m’u ka dhimtë Bajrami, po lajmi për vdekjen e Argjentit më këputi krejt. Iu luta Zotit që të ma merr edhe mu shpirtin, se ma nuk muj me duru. Bile të kish me u nalë me kaq, po gjithë po tutna mos po më gjen edhe najsen, ndonjë e keqe, nipave e mbesave që i kam”, shprehet me frikë Xhemilja.

Ajo mban shpresën dhe beson se të paktën është gjallë djali Bahtiri, për të cilin, siç thotë, nuk di gjë, sepse nuk i thotë askush asgjë për të.

“Bahtiri që është gjallë, pa ardhë nuk e len në shpi. Nuk më len vetëm ai, veç sa të merr vesh që kam ardhë deri në këtë ditë”, mban shpresën ajo.

Jeta në vetmi, sikurse në ferr

Pas përfundimit të luftës, Xhemilja kishte mbetur në shtëpi vetem me gruan e djalit Bajramit dhe me tre fëmijët e tij, dy djem dhe një vajzë. Jetoj një kohë me ta dhe, siç thotë, ndihej e lumtur dhe i bëhej zemra mal, kur i shihte fëmijët e djalit që rriteshin në vendin e çliruar edhe me gjakun e djalit të saj, Bajramit.

“Kur i pasha me bahej zemra mal. Thosha me vete, ruajmi o Zot këta fëmijë. Dy djemt e Bajramit i ngjajnë krejt atij. Edhe në shkollë shkojshin. Na u bajshim idare me pensionin e djalit edhe unë i marrsha paret e penzisë, veç mirë ishte. Por një ditë, nusja e djalit tha se do të shkojë në sheher, në Skënderaj, me jetu atje me fëmijët, ma ngat shkollës, besa thojke ndoshta ia japin edhe një banesë. Më shkurt, ajo dul prej shpije bashkë me fëmijët, e unë mbeta krejt vetëm”, tregon ajo.

Largimi i resë dhe nipave e mbesës nga shtëpia ia kishin rrënuar të gjitha ëndrrat për një jetë të përbashkët me ata që i donte më së shumti në botë.

“Nipat e mbesat a, nuk e du askë në botë sikurse ata.

Ma shumë i kam dashtë ata se djemt e çikat e mija. Edhe i du. As reja jeme nuk është e keqe, po edhe ajo e ka zor me fëmijë, e pa i nimu kërkush kurrë”, sikur e arsyeton Xhemilja nusen e djalit të tij, Bajramit, pse ajo me fëmijët kishte lënë shtëpinë në Abri dhe kishte shkuar në Skënderaj, në kërkim të një jete më të mirë. “Paguan qire ajo, i ka paret se e merr rrogën e djalit, i dalin boll”, siguron plaka. Ajo përserit vazhdimisht se e ka përcjellë fati i keq dhe se nuk i ka faj askush, ndonëse kërkon që të ndihmohet nga institucionet e shtetit.

“Veç nja po du me iu thanë, xhehnemi nuk është ndryshe, veç kështu qysh po rrnoj unë. Kjo vetmia po të hanke për se gjalli. Nuk e kam fort gat as unë. More qysh nuk diça kur më shkeli kerri, po më shpetun do kojshi që me dërgun te mjeku”, rrëfen Xhemilja, edhe për një fatkeqësi në komunikacion që i kishte ndodhur.

Duhet me u dhënë diçka edhe nënave të dëshmorëve

Xhemilja nuk pajtohet kursesi që vetëm gratë e dëshmorëve t’i gëzojnë pensionet. Sipas saj, nënat janë ato që i kanë lindur dhe që i kanë rritur ata që i dolën zot vatanit.

“Po edhe neve duhet me na ndihmu, duhet me na dhanë diçka, se na i kemi lindë edhe i kemi rritë këta djem. Vallahi as shtetit nuk është shtet, kur nuk na nimon. Në luftë krejt punët i bajshum na, edhe bukë iu jepshim ushtarëve.

Shkojsha nëpër shkie, bile nuk m’u tremke syni, e marrsha çka na vyjke për idare. Janë vra shumë gra, se shkiet nuk kanë zgjedhë, kanë vra kënd kanë mujt, veç kush ka pas ymer u pshtu. Krejt për këto hjeka, po edhe për ata që jemi nëna të dëshmorëve, duhet edhe neve me na taku diçka”, shpreh mendimin e saj, Xhemilja.

Por, Xhemilja vë në pah edhe faktin se familja e saj nuk është ndihmuar me asgjë nga institucionet e pushtetit. “Një kulm të shpisë na e kanë dhanë, kurgja tjetër. Shpi të re nuk na ndërtun, po çka me ba, kështu u shkru, me dhanë shpirt qitu vetëm, kur të më vjen vakti. Unë jam lut shumë herë me dekë, po Zoti nuk ta çon dekën pa ardhë vakti”, shprehet Xhemilja, e cila kurajohet me faktin se nipat dhe mbesat i ka mirë dhe se ata, ndonëse rrallë, i vijnë për ta parë.

“Rrallë vijnë, por kur vijnë më zgjatet jeta. Djali i madh i Bajramit i ka ba 15 vjet. Sikur t’i kisha pas këtu afër vetes, vetëm deri sa të jam gjallë”, përfundon me dëshirën e saj të fundit, Xhemile Zeka.Kajtaz Gecaj /ZERI/